Eiður skoraði en Liverpool komst áfram | Sjáðu mörkin

Liverpool er komið í 16 liða úrslit enska bikarsins í fótbolta eftir 2-1 sigur gegn B-deildarliðinu Bolton í endurteknum leik á Macron-vellinum í kvöld.

Eiður Smári Guðjohnsen kom Bolton yfir með marki úr vítaspyrnu á 59. mínútu, en hann hefði svo getað tvöfaldað forskot liðsins skömmu síðar þegar hann brenndi af úr dauðafæri.

Neil Danns lét reka sig út af í liði Bolton á 66. mínútu og eftir það var lífið erfitt fyrir B-deildarliðið.

Liverpool sótti stíft undir lokin og uppskar mark þegar Raheem Sterling afgreiddi glæsilega sendingu Emre Can í netið á 86. mínútu.

Það var svo í uppbótartíma sem Philippe Coutinho skoraði sigurmarkið með stórkostlegu skoti í slána og inn.

Liverpool mætir Crystal Palace á útivelli í 16 liða úrslitunum en Bolton er úr leik.

Eiður kemur Bolton yfir úr víti: Raheem Sterling jafnar 1-1: Sigurmark Philippe Coutinho: