Liverpool ekki haft samband við Ancelotti

Staðarblaðið í Liverpool, Liverpool Echo, segir ekkert til í þeim sögum að forráðamenn Liverpool hafi haft samband við Carlo Ancelotti um að taka við liðinu af Brendan Rodgers.

Ítalskir miðlar greindu frá því í morgun að forráðamenn félagsins væru að gefast upp á Brendan Rodgers eftir slakt gengi undanfarna mánuði en liðið hefur aðeins nælt í tvö stig í síðustu fjórum leikjum í ensku úrvalsdeildinni.

Rodgers var talinn valtur í sessi fyrir tímabilið og hefur slæm byrjun liðsins gert það að verkum að stuðningsmenn liðsins eru farnir að kalla eftir breytingum.

Er nafn Ancelotti eflaust ofarlega á blaði hjá mörgum en hann er án félags eftir að Real Madrid ákvað að segja honum upp í vor. Hefur hann þrisvar stýrt liði til sigurs í Meistaradeild Evrópu ásamt því að verða meistari á Ítalíu, Frakklandi og Englandi.