„Ferguson er bara vel við þá sem hlýða honum“

Sir Alex Ferguson, fyrrverandi knattspyrnustjóri Manchester united, lætur Mino Raiola, umboðsmann Pauls Pogba, heyra það í nýrri bók sinni, Leading.

Í bókinni reynir hann að útskýra hvers vegna Paul Pogba yfirgaf Manchester United 19 ára gamall árið 2012, en nokkuð ljóst er að það voru ein mestu mistök Skotans.

United fékk aðeins 800.000 pund fyrir strákinn á þeim tíma, en hann er nú þrefaldur Ítalíumeistari með Juventus og var kjörinn besti ungi leikmaðurinn á HM 2014.

Ferguson gagnrýndi Pogba fyrir virðingarleysi þegar hann yfirgaf félagið fyrir þremur árum, en í nýju bókinni segir hann umboðsmanninn Mino Raiola eiga stóra sök í máli.

Ferguson getur líka haft rangt fyrir sér

„Það eru einn til tveir umboðsmenn í fótboltanum sem mér líkar ekki við og Mino Raiola er einn af þeim,“ segir Ferguson í bókinni.

„Ég treysti honum ekki frá fyrstu sekúndu. Paul var á þriggja ára samningi og við hann var hægt að bæta einu ári. En síðan birtist Raiola og fyrsti fundur okkar var stórslys.“

„Við vorum eins og olía og vatn. Eftir þetta áttum við ekki möguleika því Raiola var búinn að koma sér vel fyrir hjá Pogba og fjölskyldu hans. Síðan samdi leikmaðurinn við Juventus,“ segir Ferguson.

Raiola svarar ásökunum Ferguson í viðtali við Tuttosport og segir: „Orð hans lýsa vinnu minnu ekki á neikvæðan hátt heldur er þetta sönnun þess að ég er góður í því sem ég geri.“

„Ég verð að horfa til þess sem er best fyrir leikmennina mína. Ef ég hefði hugsað um sjálfan mig og hvað væri best fyrir mig til skemmri tíma var best að halda Pogba í Manchester.“

„En ég hugsaði fyrst og fremst um hagsmuni Pogba og fyrir hann var best að fara til Tórínó. Kannski líkar Ferguson bara vel við þá sem hlýða honum. Ég sé ekki betur en Ferguson hafi ekki hugmynd um hvernig maður Pogba er. Ferguson var frábær stjóri en bestu stjórarnir hafa stundum rangt fyrir sér,“ segir Mino Raiola.