Norsku vopnin enn ekki farin úr landi

Vopnin sem bárust íslensku landhelgisgæslunni frá norska hernum fyrir áramót eru enn ekki farin úr landi. Flutningur vopnanna til Íslands vakti mikla athygli og talsverða gagnrýni þegar greint var frá honum á sínum tíma og í kjölfarið tilkynnti gæslan um það vopnin yrðu send aftur til Noregs „við fyrsta hentugleika.“

Sú tilkynning barst í nóvember en að því að kemur fram í svari gæslunnar við fyrirspurn Vísis eru vopnin enn ekki komin úr landi.

„Fyrirhugað var að flytja vopnin með flutningavél norska hersins sem væntanleg var hingað um eða uppúr miðjum maí,“ segir í svarinu. „Nú hefur fengist staðfest að vélin mun ekki hafa viðkomu hér og því er Landhelgisgæslan nú að leita annarra leiða til að flytja vopnin til Noregs.“

Sjá einnig: Umræðan um byssurnar gæti skaðað ímynd lögreglunnar

Vísir greindi frá því í desember að til að komast hjá umtalsverðum flutningarkostnaði, hyggðist Landhelgisgæslan bíða tækifæris til að senda þau með vélum Norðmanna sem ættu hér leið hjá eða ef önnur tæki gæslunnar ættu erindi til Noregs.

„Ekki liggur ljóst fyrir hvaða leið verður farin en vonandi verður af flutningi fljótlega,“ segir í svarinu.

Sjá einnig: Ráðherrar sverja af sér vélbyssur

DV greindi frá því þann 21. október síðastliðinn að lögregluyfirvöld hefðu flutt talsvert magn skotvopna til landsins en engin umræða hafði þá farið fram á þingi um að auka vopnabúnað lögreglu og Landhelgisgæslunnar.

Þá kom síðar í ljós að norski herinn átti von á milljóna greiðslu vegna afhendingu vopnanna en gæslan segist alltaf hafa talið vopnin gjöf frá hernum. Ákvörðunin um að skila byssunum var að sögn gæslunnar tekin vegna þess að ekki kæmi til greina að verja takmörkuðu fé stofnunarinnar til vopnakaupa.