Innlent

„Ég get ekki sagt um það hvort þessar MP5 byssur eru frá okkur“

Þorbjörn Þórðarson skrifar
Georg Lárusson forstjóri Landhelgisgæslunnar.
Georg Lárusson forstjóri Landhelgisgæslunnar.
„Landhelgisgæslan hefur verið vopnuð frá upphafi en að öðru leyti munum við ekki tjá okkur um fjölda, stærð eða tegundir vopna,“ segir Georg Lárusson forstjóri Landhelgisgæslunnar.



Eins og komið hefur fram fékk embætti ríkislögreglustjóra 150 MP5 hríðskotabyssur afhentar frá Norðmönnum án þess að nokkur umræða hafi farið fram um það í þinginu og án þess að sett hafi verið reglugerð af dómsmálaráðherra um umgengni við skotvopnin. Vopnin fóru til lögregluembættanna og er það ákvörðun lögreglustjóra í umrætt sinn hvort beita eigi vopnunum. Þá hefur nokkrum lögreglubílum verið breytt til að koma fyrir sérstöku læstu hólfi fyrir skotvopnin.



Jón F. Bjartmarz, yfirlögregluþjónn hjá embætti ríkislögreglustjóra, sagði í Kastljósi í gær að landhelgisgæslan hafi haft milligöngu um að íslenska lögreglan fékk vopninn frá Norðmönnum.



Norski herinn afhenti vopnin

„Eina sem ég get sagt er að við eigum ekki kjarnorkuvopn. Við munum ekki tjá okkur um vopn Landhelgisgæslunnar nema að fyrirskipan ráðherra eða samkvæmt úrskurði um upplýsingamál,“ segir Georg Lárusson.



Kjarninn greindi frá því í morgun að það hafi verið norski herinn sem afhenti vopnin en ekki norska lögreglan. Í frétt norska dagblaðsins Verdens Gang frá því í júlí síðastliðnum var jafnframt greint frá því að norska lögreglan hafi vitað af MP5 byssunum á lager hjá norska hernum og óskað eftir þeim, en ekki fengið.



Jón Bjartmarz fullyrðir að Landhelgisgæslan hafi haft milligöngu um afhendingu þessara MP5 riffla. Hvernig gekk það fyrir sig? „Ég veit ekki nákvæmlega hvernig þessi vopn sem lögreglan hefur undir höndum eru til komin en ég get kynnt mér það. Á þessari stundu hef ég ekki nægar upplýsingar til að segja þér neitt um málið. Við erum í miklu og nánu samstarfi við lögregluna. Ég get ekki sagt um það hvort þessar MP5 byssur eru frá okkur eða eign okkar. Það er útilokað að starfsmenn hafi afhent lögreglunni byssurnar án minnar vitneskju,“ segir Georg.



Svo virðist sem Jón Bjartmarz hafi verið áhugasamur um aukið aðgengi lögreglumanna að skotvopnum um nokkra hríð. Hinn 4. desember 2012 sagði hann tíma­bært að ræða þann mögu­leika að lög­reglu­menn ættu aðgang að vopn­um í lög­reglu­bíl­um, líkt og er í Nor­egi. Þessi ummæli lét hann falla á fundi Varðbergs, samtaka um vestræna samvinnu og alþjóðamál. 


Tengdar fréttir

Aukið við vopnabúnað lögreglunnar

Verið er að auka við vopnabúnað íslensku lögreglunnar. Stefnt er að því að allir lögreglubílar landsins verði búnir Glock 17-hálfsjálfvirkri skammbyssu og MP5-hríðskotabyssu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.