Minnst 22 eru látnir í Kaíró, höfuðborg Egyptalands, eftir að stuðningsmenn knattspyrnuliðsins Zamalek reyndu að ryðjast inn á leik án þess að eiga miða á hann. Til átaka kom á milli lögreglu og áhangenda liðsins með fyrrgreindum afleiðingum.
Átökin áttu sér stað fyrir leik liðsins gegn ENPPI í úrvalsdeildinni þar í landi. Þetta er ekki í fyrsta skipti sem fólk fellur í átökum tengdum knattspyrnu í Egyptalandi en árið 2012 létust tæplega áttatíu manns í slagsmálum eftir leik í Port Said. Fyrir rúmri viku var alls var 21 maður dæmdur til dauða fyrir þátt sinn í þeim átökum.
Eftir þann leik var komið á hámarki yfir það hve margir mættu vera viðstaddir knattspyrnuleiki. Því þaki var létt fyrir skemmstu en líklegt þykir að því verði komið á á nýjan leik í kjölfar þessa.
Fótboltabullur eru margar í Egyptalandi og spiluðu nokkuð stóra rullu í mótmælunum gegn Hosni Mubarak árið 2011. Niðurstaða þeirra var að Mubarak lét af embætti.
Þrátt fyrir mannfallið og átökin fór leikurinn fram.
