Auðvelt hjá Þýskalandi og Noregi á HM | Myndbönd

Þýskaland gerði sér lítið fyrir og vann Fílabeinsströndina 10-0 á HM í fótbolta í Kanada í gær.

Célia Šašić setti met í leiknum en þessi 26 ára framherji var komin með þrennu eftir aðeins 31 mínútu. Enginn leikmaður hefur verið jafn fljótur að skora þrennu í sögu HM. Anja Mittag skoraði einnig þrennu fyrir Þýskaland sem var 5-0 yfir í hálfleik.

Þær þýsku bættu svo fimm mörkum við í seinni hálfleik. Simone Laudehr, Sara Däbritz, Melaine Behringer og Alexandra Popp komust einnig á blað fyrir Þjóðverja sem eru með þrjú stig í B-riðli, líkt og Noregur sem vann öruggan sigur á Tælandi í gær, 4-0.

María Þórisdóttir, dóttir Þóris Hergeirssonar, landsliðsþjálfara norska kvennalandsliðsins í handbolta, sat allan tímann á varamannabekk norska liðsins.     

Isabell Herlovsen skoraði tvívegis og þær Trine Rønning og Ada Hederberg sitt markið hvor fyrir Noreg sem mætir Þýskalandi í stórleik riðilsins á fimmtudaginn kemur.

Mörkin úr leikjunum tveimur má sjá hér að neðan.

Þýskaland 10-0 Fílabeinsströndin Noregur 4-0 Tæland