Þriggja ára dóttur Sterling hótað á Twitter

Lögregla í Bretlandi hefur hafið rannsókn á hótunum sem fjölskydlu Raheem Sterling, leikmanns Liverpool, hefur borist.

Sterling er við það að ganga í raðir Manchester City sem greiðir Liverpool 49 milljónir punda fyrir kappann. Mikið hefur verið fjallað um málið í enskum fjölmiðlum í sumar en Sterling hefur gengið hart á eftir því að losna frá Liverpool.

Fréttir af yfirvofandi félagaskiptum Sterling bárust svo á sunnudag en þann sama dag fékk Sterling hótanir á Twitter. Meðal annars beindust þær gegn þriggja ára dóttur hans.

Talsmaður lögreglunnar í Liverpool, sem er með málið til rannsóknar, sagði að hótunin hafi verið ógeðfelld og að fast yrði tekið á málinu. Fleiri ummæli sem látin voru falla eru einnig til rannsóknar og flokkast sum þeirra undir kynþáttaníð. Mörgum þeirra hefur nú verið eytt.