Obama: Samkomulagið kemur í veg fyrir frekari útbreiðslu kjarnavopna

Nýtt samkomulag um kjarnorkuáætlun Írana er trygging fyrir að kjarnavopn breiðist ekki enn frekar út. Þetta sagði Barack Obama Bandaríkjaforseti þegar hann brást við fréttum af samkomulaginu fyrr í dag.

„Í dag höfum við stöðvað útbreiðslu kjarnavopna í heimshlutanum. Þetta er samningur sem tryggir öruggari og vænlegri heim,“ sagði forsetinn.

Samkvæmt samkomulaginu er komið í veg fyrir að Íranir geti þróað kjarnavopn, en þeir hafa ætíð haldið því fram að kjarnorkuáætlun landsins þjóni friðsamlegum tilgangi. Í skiptum verður viðskiptaþvingunum vesturveldanna á hendur Íran aflétt.

Brot myndi kalla á hörð viðbrögð

Tilkynnt var um samkomulag um takmarkanir á kjarnorkuáætlun Írana fyrr í dag, en samningaviðræður hafa staðið undanfarin ár á milli Írans og sex heimsvelda – Bandaríkjanna, Bretlands, Frakklands, Kína, Rússlands og Þýskalands.

Obama sagði að ef írönsk stjórnvöld færu ekki að ákvæðum samningsins myndi það kalla á hörð viðbrögð og viðskiptaþvingunum yrði aftur komið á.

Tryggja að farið sé að ákvæðum samningsins

Forsetinn lagði áherslu á að sérfræðingar muni sjá til þess að farið sé í smáatriðum eftir ákvæðum samningsins. Verður þeim meðal annars veittur aðgangur að kjarnorkustöðvum Írana.

Obama greindi einnig frá því að hann muni beita neitunarvaldi sínu gegn öllum þeim lögum í Bandaríkjaþingi sem miða að því að hindra framgang samkomulagsins, en margir þingmenn hafa lýst sig andsnúna því.