Ungur knattspyrnumaður hneig niður í miðjum leik og lét lífið

Junior Dian, 23 ára gamall enskur fótboltamaður, hneig niður í miðjum æfingaleik utandeildarliða á Englandi í gær.

Frá þessu greinir BBC, en Dian var á reynslu hjá Tonbridge Angels. Hann hneig niður þegar 20 mínútur voru eftir af leik liðsins gegn Whyteleafe í Surrey.

Maðurinn ungi var færður rakleiðis í sjúkrabíl á spítala þar sem hann andaðist snemma í morgun.

„Þetta eru skelfilegar fréttir og það eina sem við getum huggað okkur við er að Junior dó við að gera eitthvað sem hann augljóslega elskaði mikið,“ segir Steve Churcher, stjórnarformaður Tonbridge, á heimasíðu félagsins.

Sjúkraþjálfarar beggja liða huguðu að Dian þegar hann hneig niður, en leikurinn var stöðvaður þegar atvikið gerðist og fór hann ekki aftur af stað.

„Öll okkar samúð er með fjölskyldu hans,“ segir Steve Churcher.