Sterling nálgast nýjan samning hjá Liverpool

Raheem Sterling, enska ungstirnið í röðum Liverpool, færist nær því að skrifa undir nýjan samning við félagið, en samningaviðræður hafa staðið yfir undanfarnar vikur.

Knattspyrnuvefurinn Goal.com segist hafa heimildir fyrir þessu, en Sterling á að hafa verið fullvissaður um að Brendan Rodgers verði áfram stjóri liðsins, sama hvernig fer á tímabilinu.

Sterling hafði áhyggjur af framtíð stjórans og vildi því ekki skrifa undir samning strax við Liverpool.

Framherjinn ungi er hrifinn af Rodgers sem hefur gert hann að einum mest spennandi leikmanni heims, en Sterling var kjörinn gulldrengur Evrópu undir lok síðasta árs.