Gomez fer í læknisskoðun á föstudag

Joe Gomez verður orðinn leikmaður Liverpool fyrir vikulok ef allt gengur að óskum forráðamanna félagsins. Fullyrt er að hann fari í læknisskoðun á föstudag.

Gomez er nítján ára varnarmaður sem er á mála hjá Charlton. Samkvæmt samningi hans við félagið er því skylt að gangast við tilboði upp á minnst 3,5 milljónir punda og er Liverpool sagt reiðubúið að greiða uppsett verð.

Hann á þó sjálfur eftir að semja um kaup og kjör en afar líklegt er talið að gengið verði frá félagaskiptunum innan skamms.

Gomez yrði fjórði leikmaðurinn sem kæmi til Liverpool í sumar en félagið er þegar búið að semja við James Milner, Danny Ings og Adam Bogdan. Nathaniel Clyne, varnarmaður Southampton, hefur einnig verið orðaður við félagið.