Fyrrverandi fyrirliði Tottenham til Sunderland

Franski varnarmaðurinn Younes Kaboul er genginn í raðir enska úrvalsdeildarliðsins Sunderland frá Tottenham.

Kaupverðið hefur ekki verið gefið upp en Kaboul skrifaði undir fjögurra ára samning við Sunderland sem endaði í 16. sæti úrvalsdeildarinnar á síðasta tímabili.

Hinn 29 ára gamli Kaboul hefur leikið á Englandi frá tímabilinu 2007-08. Frakkinn lék fyrst eitt tímabil með Tottenham en færði sig svo um set til Portsmouth. Hann lék með liðinu í tvö ár áður en hann fór aftur til Spurs 2010.

Kaboul, sem var fyrirliði Tottenham um tíma, lék aðeins 15 leiki í öllum keppnum með Spurs á síðasta tímabili.

Hann er annar varnarmaðurinn sem Sunderland fær í sumar en áður var liðið búið að tryggja sér þjónustu Úrúgvæans Sebastians Coates. Miðvörðurinn Santiago Vergini er hins vegar farinn frá Sunderland á láni til Getafe á Spáni.