Jói Kalli: Þoli ekki þegar Van Gaal situr bara og skrifar

Manchester United tapaði þriðja deildarleiknum í röð á laugardaginn þegar liðið lá í valnum á heimavelli í fyrsta sinn á tímabilinu gegn Norwich, 2-1.

Ástandið var svo slæmt að Ryan Giggs trítlaði niður á hliðarlínu til að gefa skipanir inn á völlinn en þjálfarateymi hefur meira og minna farið að fordæmi Van Gaal í vetur og setið sem fastast á varamannabekknum.

„Það er gaman að sjá það sé líf í þjálfarateyminu hjá Manchester United og þeir séu að reyna að koma einhverjum skilaboðum á framfæri,“ sagði Jóhannes Karl Guðjónsson um Ryan Giggs í Messunni á Stöð 2 Sport 2 HD í gærkvöldi.

„Ég þoli ekki þegar Van Gaal situr bara með pennan og skrifar og skrifar. Hvernig á það að hjálpa United-liðinu í leiknum?“ spurði Jóhannes.

Skagamaðurinn var undir stjórn Van Gaal hjá AZ Alkmaar og spurði Hjörvar Hafliðason hann hvort Van Hollendingurinn hafi verið jafn rólegur þar.

„Nei, alls ekki. Hann lét í sér heyra,“ sagði Jóhannes Karl Guðjónsson.

Þeir félagar í Messunni fóru svo í greiningu á spilamennsku Manchester United en alla umræðuna má sjá í spilaranum hér að ofan.