Origi bjargaði stigi fyrir Liverpool | Sjáðu mörkin og tæklinguna hjá Gardner

Liverpool varð að sætta sig við jafntefli gegn West Brom í ensku úrvalsdeildinni í dag. Lokatölur 2-2.

Lærisveinar Jürgens Klopp byrjuðu leikinn betur og komust yfir á 21. mínútu þegar fyrirliðinn Jordan Henderson skoraði af stuttu færi eftir að Adam Lallana skallaði boltann til hans.

Forystan entist aðeins í níu mínútur því eftir hálftíma leik jafnaði Craig Dawson metin eftir hornspyrnu Chris Brunt og mistök Simon Mignolet í marki Liverpool.

Undir lok fyrri hálfleiks hélt Jonas Olsson að hann hefði komið West Brom yfir en markið var réttilega dæmt af vegna rangstöðu þótt Craig Pawson, dómari leiksins, hafi verið lengi að kveða dóminn upp.

Olsson var ekki hættur og á 73. mínútu skallaði hann hornspyrnu Brunt í netið. Það mark fékk að standa og virtist ætla að duga West Brom til sigurs.

En á sjöttu mínútu uppbótartíma jafnaði varamaðurinn Divock Origi metin þegar hann skaut í varnarmann gestanna og inn og þar við sat.

Hátt í tíu mínútum var bætt við venjulegan leiktíma vegna meiðsla Dejan Lovren en Craig Gardner braut illa á króatíska miðverðinum á 74. mínútu. Brotið var ljótt en Gardner fékk ekki einu sinni gult spjald frá Pawson.

Liverpool er í 9. sæti deildarinnar með 24 stig en West Brom er í því 13. með 20 stig.