Rio: United er að fara aftur á bak

Leikmenn Manchester United eru hræddir við að tjá sig á vellinum og liðið er að fara aftur á bak undir stjórn Louis van Gaal samkvæmt Rio Ferdinand, fyrrverandi miðvarðar liðsins.

Van Gaal hefur verið gagnrýndur harkalega fyrir spilamennsku Manchester United á leiktíðinni en liðið er nú án sigurs í síðustu fimm leikjum, úr leik í Meistaradeildinni og tapaði gegn nýliðum Bournemouth um síðustu helgi.

Ferdinand segir að leikstíll liðsins verði að breytast og það sem fyrst ætli liðið að hanga á Meistaradeildarsætinu. United er sem stendur í fjórða sæti í úrvalsdeildinni, fjórum stigum frá toppliði Arsenal.

„Leikmennirnir spila svo öruggt því þeir þora ekki að mæta afleiðingum þess að taka áhættur,“ segir Ferdinand í viðtali við The Sun.

„Manchester United er að fara aftur á bak aftur og ég sé það ekki breytast því knattspyrnustjórinn vill ekki breytast. Leikmennirnir verða að fá leyfi til að tjá sig á vellinum.“

Van Gaal er með samning til ársins 2017 en framtíð hans er í uppnámi vegna stöðu United-liðsins þessa dagana.

Pep Guardiola, þjálfari Bayern München, og Carlo Ancelotti, fyrrverandi þjálfari AC Milan og Real Madrid, hafa verið orðaðir við stjórastöðuna á Old Trafford.

„Pep og Carlo Ancelotti verða á lausi í sumar og spurningin er geta þeir staðið sig betur en Van Gaal?“ segir Rio.

„Stjórnin og eigendurnir gætu viljað halda tryggð við Van Gaal eftir að fjárfesta svona miklu í liðið fyrir hann en þeir verða líka að gera það besta fyrir Manchester United. Það verður katastrófa ef United nær ekki einu af efstu fjórum sætunum,“ segir Rio Ferdinand.