Jói Kalli og Arnar tóku Van Gaal í gegn: „Stutt á milli þess að vera snillingur og trúður“

Manchester United er án sigurs í síðustu fimm leikjum í öllum keppnum en liðið tapaði fyrir nýliðum Bournemouth á útivelli í ensku úrvalsdeildinni um helgina.

Louis van Gaal, knattspyrnustjóri United, hefur verið harðlega gagnrýndur á tímabilinu og sérstaklega undanfarnar vikur fyrir óáhugaverða og leiðinlega spilamennsku liðsins sem skilar svo engum úrslitum.

Jóhannes Karl Guðjónsson, fyrrverandi atvinnu- og landsliðsmaður í fótbolta, var gestur í Messunni í gær en hann var undir stjórn Louis van Gaal hjá AZ Alkmar.

„Við Van Gaal áttum ekkert alveg skap saman en ég verð að viðurkenna að þetta er einn besti þjálfari sem ég hef komist í kynni við,“ sagði Jóhannes. „Mér fannst hann alveg frábær á þeim tíma en hann er að gera allt aðra hluti þarna eins og það sem hann var að leggja upp með.“

„Hann lifir fyrir fótbolta og það er ekkert annað sem kemst að hjá honum en fótbolta. Hann er, eða var, með frábærar hugmyndir um fótbolta og er þekktur fyrir þetta Barcelona-leikkerfi 3-4-3 sem var frábært á sama tíma. Þetta er einhver allt annar fótbolti sem hann er að sýna hjá Manchester United í dag,“ sagði Jóhannes.

Enginn sem getur breytt leiknum

Arnar Gunnlaugsson tók undir orð Jóhannesar en hann hefur engan húmor fyrir spilamennsku Manchester United undir stjórn Louis van Gaal.

„Sumir af þessum eldri þjálfurum ná ekki að þróast með leiknum. Leikurinn þróast smá á hverju ári. Það eru alltof margir af þessum eldri þjálfurum sem staðna. Van Gaal er hrokafyllri en andskotinn. Það er hans leið eða engin leið,“ sagði Arnar og Jóhannes bætti við:

„Það er galið að hann hafi látið menn eins og Di María, Januzaj og Chicharito fara, menn sem geta skorað fyrir hann mörk og geta breytt leikjum. Það er enginn svoleiðis maður hjá þeim í dag.“

Arnar benti á atvikið þegar Van Gaal setti Tim Krul í markið í vítaspyrnukeppninni gegn Kosta Ríka á HM 2014 en þá var hann mikill snillingur að flestra mati. Svoleiðis er ekki talað um Hollendinginn í dag.

„Það er stutt á milli þess að vera snillingur og trúður í þessu. Van Gaal var snillingur þegar hann setti Tim Krul í markið í vítaspyrnukeppninni en nú virkar hann eins og trúður þegar hann tekur Fellaini af velli í síðasta leik,“ sagði Arnar Gunnlaugsson.

Alla umræðuna má sjá í spilaranum hér að ofan.