Yfir 400 manns mynduðu ljósafoss niður Esjuna

Yfir 400 manns mættu í Ljósafossgöngu Ljóssins á Esjuna í gær. Ljósið er endurhæfingar- og stuðningsmiðstöð fyrir fólk sem hefur fengið krabbamein og aðstandendur þeirra og fagnar 10 ára afmæli sínu í ár. Gangan var farin í tilefni af því.

Að sögn Ernu Magnúsdóttur, forstöðumanns Ljóssins, heppnaðist gangan ákaflega vel.

„Það var glampandi sól, ofboðslega hlýtt og gott og smá föl í fjallinu. Við vorum um einn og hálfan tíma upp að steini, þar settu allir upp höfuðljós og svo gengum við niður í röð til að mynda svona nokkurs konar ljósafoss,“ segir Erna.

Aðspurð segir hún þetta ekki í fyrsta skipti sem farið er í slíka göngu.

„Við gerðum þetta líka þegar við vorum 5 ára en það voru miklu fleiri sem tóku þátt núna.“

Myndina hér að ofan tók ljósmyndarinn Ragnar Th. Sigurðsson sem er einn af þeim sem hafa notið þjónustu Ljóssins.