Advocaat hættur með Sunderland | Allardyce orðaður við stöðuna

Hollenski knattspyrnustjórinn Dick Advocaat ákvað í dag að hætta störfum sem knattspyrnustjóri Sunderland í ensku úrvalsdeildinni en Sunderland vermir botnsæti ensku úrvalsdeildarinnar ásamt nágrönnum sínum í Newcastle eftir átta umferðir.

Ekkert hefur gengið hjá Sunderland undir stjórn Advocaat undanfarnar vikur en honum tókst að bjarga liðinu frá falli á síðasta tímabili þegar flest virtist benda til þess að félagið myndi falla niður um deild.

Voru orðrómar um að hann myndi segja upp starfi sínu eftir leikinn gegn West Ham um helgina ef Sunderland tækist ekki að næla í þrjú stig og hann stóð við það eftir að Sunderland missti niður tveggja marka forskot.

Aðstoðarmaður Advocaat, Zeljko Petrovic, sagði sömuleiðis upp störfum sínum en enskir miðlar greindu frá því að Sam Allardyce væri líklegastur til þess að taka við liðinu.