Þriðji leikmaðurinn slítur krossband hjá nýliðunum og nú er það markaskorarinn

Callum Wilson, framherji nýliða Bournemouth í ensku úrvalsdeildinni, er alvarlega meiddur og verður ekki með næsta hálfa árið.

Wilson var borinn af velli eftir 17 mínútur í 2-1 tapi Bournemouth gegn Stoke um helgina, en í ljós kom í læknisskoðun að hann sleit krossband í hægra hnénu.

Framherjinn fer í aðgerð í næstu viku áður en hann hefur endurhæfingu. Hann verður í fyrsta lagi klár í mars á næsta ári.

Þetta er gríðarlegt áfall fyrir Bournemouth, en Wilson hefur verið einn besti maður liðsins og skorað fimm mörk í sjö fyrstu umferðunum.

Nýliðarnir hafa ekki verið heppnir með meiðsli í fyrstu umferðum ensku úrvalsdeildarinnar, en tveir lykilmenn sem keyptir voru fyrir samtals 19 milljónir punda fyrir leiktíðina slitu krossband í sama leiknum fyrr á leiktíðinni.

Þetta eru hægri bakvörðurinn Tyrone Mings sem keyptur var frá Ipswich fyrir metfé hjá félaginu og Max Gradel sem kom til Bournemouth frá St. Étienne fyrir tímabilið.