Sterling: Ég var í alvörunni veikur

Raheem Sterling segir ekkert hæft í þeim ásökunum að hann hafi logið til um veikindi sín þegar hann missti af tveimur æfingum skömmu áður en hann fór frá Liverpool til Manchester City.

Félagaskipti Sterling áttu sér langan aðdraganda en Liverpool var ekki reiðubúið að selja hann fyrr en að City bauð 49 milljónir punda í kappann.

Á fyrstu viku undirbúningstímabilsins hringdi Sterling sig inn veikan tvo daga í röð en Sterling segir að það hafi ekkert óvenjulegt sem bjó þar að baki. Hann var í alvörunni veikur.

„Allir héldu að ég hefði logið til um veikindi mín. Á þriðjudeginum fann ég til í maganum fyrir æfingu en samt tók ég þátt í æfingunni,“ sagði Sterling í viðtali við Manchester Evening News.

„Þennan dag fór ég heim og tilkynnti lækninum að ég væri veikur. Ég var með magaverki og niðurgang. Læknirinn sagði að ég gæti ekki verið í kringum aðra leikmenn og því var ég heima næstu tvo sólarhringana. Það gerði ég samkvæmt læknisráði.“