Sumarhreinsanirnar hjá Tottenham halda áfram

Stuttri dvöl Benjamins Stambouli hjá Tottenham er lokið en miðjumaðurinn er genginn í raðir Frakklandsmeistara Paris Saint-Germain.

Stambouli skrifaði undir fimm ára samning við PSG en talið er að félagið hafi greitt Tottenham um sex milljónir punda fyrir hann.

Stambouli, sem er 24 ára, var keyptur til Tottenham fyrir síðasta tímabil og lék 25 leiki með liðinu í öllum keppnum. Hann hóf ferilinn með Montpellier en hann varð franskur meistari með liðinu 2012.

Mauricio Pochettino, knattspyrnustjóri Tottenham, hefur verið duglegur að taka til í leikmannahópi Spurs í sumar en hann hefur selt leikmenn fyrir tæplega 30 milljónir punda.

Meðal leikmanna sem hafa yfirgefið Spurs í sumar eru Lewis Holtby, Younes Kaboul, Paulinho, Étienne Capoue og áðurnefndur Stambouli.

Aðeins þrír leikmenn hafa hins vegar verið keyptir til Tottenham í sumar; miðverðirnir Toby Alderweireld og Kevin Wimmer og hægri bakvörðurinn Kieran Trippier.