Bentaleb framlengir við Tottenham til ársins 2020

Miðjumaðurinn Nabil Bentaleb hefur framlengt samning sinn við enska úrvalsdeildarliðið Tottenham Hotspur til næstu fimm ára. Nýji samningurinn gildir til ársins 2020.

Bentaleb, sem er tvítugur, lék sinn fyrsta leik fyrir Tottenham gegn Southampton í desember 2013 og hefur síðan þá verið fastamaður í liðinu.

Bentaleb lék 26 deildarleiki með Tottenham á síðasta tímabili en Spurs endaði í 5. sæti úrvalsdeildarinnar.

Þrátt fyrir að vera fæddur í Frakklandi leikur Bentaleb með alsírska landsliðinu. Miðjumaðurinn á að baki 17 landsleiki fyrir Alsír og lék m.a. á HM 2014 og í Afríkukeppninni 2015.