Rodgers um Sterling: Ekkert ósætti á milli okkar

Brendan Rodgers, stjóri Liverpool, neitar því að ósætti hafi ríkt á milli hans og Raheem Sterling líkt og enskir fjölmiðlar hafa haldið fram.

Rodgers staðfesti að Sterling sé á leið frá félaginu en sá síðarnefndi mun í dag gangast undir læknisskoðun hjá Manchester City. Liverpool samþykkti tilboð City í kappann í gær.

Það var mikið fjallað um Sterling í síðustu viku. Hann baðst undan því að fara með Liverpool í æfingaferð til Asíu og Ástralíu og missti svo af tveimur æfingum eftir að hafa hringt sig inn veikann.

Fullyrt var að Sterling væri ósáttur við að spila undir stjórn Rodgers og að hann myndi vera um kyrrt hjá Liverpool ef einhver annar væri að stýra liðinu.

„Staða mála er mjög einföld. Félagið komst að samkomulagi við annað félag um félagaskipti Raheem. Það mun ganga í gegn ef hann stenst læknisskoðun,“ sagði Rodgers á blaðamannafundi eftir komu liðsins til Bangkok í dag.

„Samband mitt við Raheem hefur alltaf verið mjög gott, sama hvað var fullyrt í fjölmiðlum. Það var sterkt þar til að hann fór. Það er ekkert vandamál á milli okkar,“ sagði Rodgers enn fremur.