Fenerbahce staðfestir komu Van Persie

Robin van Persie er nú formlega genginn í raðir Fenerbahce frá Manchester United en tyrkneska félagið staðfesti það í dag.

Hollendingurinn skrifar undir þriggja ára samning við félagið en hann er 31 árs gamall. Hann hélt til Istanbul á sunnudag og hlaut þar ótrúlegar viðtökur hjá stuðningsmönnum Fenerbahce.

Kaupverðið mun hafa verið 4,7 milljónir punda en Untied greiddi 24 milljónir fyrir Van Persie sem kom frá Arsenal árið 2012. Hann skoraði alls 58 mörk í 105 leikjum fyrir United en náði að skora aðeins tíu mörk á síðasta tímabili.

Radamel Falcao er einnig farinn frá United og þá er talið líklegt að Javier Hernandez, sem var í láni hjá Real Madrid, sé á förum en hann hefur verið í viðræðum við Orlando FC í Bandaríkjunum.

United hefur þó fengið Memphis Depay í sumar en hann gæti mögulega verið notaður sem framherji.