Van Persie á leið til Tyrklands og Schweinsteiger í læknisskoðun í dag

Robin van Persie hefur að öllum líkindum spilað sinn síðasta leik með Manchester United. Hann mun í dag halda til Tyrklands til að ganga frá vistaskiptum sínum til Fenerbahce.

"Áður höfðum við sagt frá því að við værum í viðræðum við Manchester United og hollenska leikmanninn Robin van Persie. Að kvöldi sunnudagsins 12. júlí mun hann mæta til Istanbul," segir í yfirlýsingu á heimasíðu Fenerbahce.

Þá er haft eftir Sky Sports að þýski miðjumaðurinn Bastian Schweinsteiger muni fara í læknisskoðun hjá Manchester United í dag. Ef hann stenst hana, þá á aðeins eftir að semja um kaup og kjör.

Kaupverðið er talið vera 14,4 milljónir punda eða sem nemur um 3 milljörðum króna. Joachim Löw, þjálfari þýska landsliðsins í knattspyrnu, spáir því að Bastian Schweinsteiger muni slá í gegn með Manchester United.

"Basti er mikill leiðtogi og heimsklassa leikmaður sem getur sett mark sitt á öll lið, þ.m.t. auðvitað Manchester United. Hann þekkir Louis van Gaal, sem vildi fá hann. Það veit á gott.

Ég veit að hann [Schweinsteiger] hefur enn mikinn metnað og háleit markmið. Hann mun mæta nýrri áskorun í Englandi með því að helga sig verkefninu," segir Löw.