Sterling bíður lengur eftir fyrsta leiknum

Raheem Sterling mun ekki spila með sínu nýja liði, Manchester City, sem leikur æfingaleik gegn systurfélagi sínu, Melbourne City, í æfingaferð sinni í Ástralíu á morgun.

Þetta staðfesti knattspyrnustjórinn Manuel Pellegrini í dag en Sterling æfði með nýju liðsfélögum sínum í fyrsta sinn í dag eftir að hafa gengið frá félagaskiptum frá Liverpool fyrr í vikunni.

City mætir einnig Roma og Real Madrid í Melbourne og gæti Sterling komið við sögu í þeim leikjum. En það er of snemmt að ætlast til þess að Sterling spili á morgun að sögn Pellegrini.

„Hann er í sömu stöðu og leikmenn sem eru að koma úr landsliðsverkefnum. Þeir eru rétt svo að byrja nú að æfa. En hann gæti spilað í næstu viku,“ sagði Pellegrini sem reiknar með því að Sterling muni hafa stórt hlutverk í sínu liði.

„Raheem getur spilað í mörgum mismunandi stöðum. Hann getur spilað sem framherji og líka úti á kantinum. Hann er afar ungur og getur bætt sig á mörgum sviðum.“