Gerrard skoraði í fyrsta deildarleiknum með LA Galaxy

Steven Gerrard fer vel af stað með nýja liðinu Los Angeles Galaxy en hann skoraði og átti stoðsendingu í 5-2 sigri liðsins á San Jose Earthquakes í MLS-deildinni í Bandaríkjunum í nótt.

Allt það helsta úr leiknum má sjá í myndbandinu hér að neðan.

Það blés ekki byrlega fyrir Gerrard og félögum í upphafi leiks en eftir 25 mínútur var staðan 0-2, San Jose í vil. En þá fór Galaxy-liðið í gang.

Írski landsliðsmaðurinn Robbie Keane minnkaði muninn úr vítaspyrnu á 30. mínútu og sjö mínútum síðar jafnaði Gerrard metin með skoti úr teignum eftir skyndisókn.

Hann lagði upp mark fyrir Keane á 64. mínútu og Írinn kom LA Galaxy svo í 4-2 með sínu þriðja marki á 80. mínútu. Sebastian Lletget gulltryggði svo sigurinn með marki á lokamínútunni.

LA Galaxy er í efsta sæti Vesturdeildarinnar með 34 stig eftir 22 leiki.