Zlatan spilar mögulega með Svíum á ÓL í Ríó

Zlatan Ibrahimovic var fljótur að óska drengjunum í 21 árs landsliði Svía til hamingju með sætið í undanúrslitunum á EM 21 árs landsliða í Tékklandi en með því að komast þangað tryggði sænska liðið sér sæti á Ólympíuleikunum í Ríó á næsta ári.

Zlatan Ibrahimovic er sjálfur spenntur fyrir því að fá tækifæri til að spila á Ólympíuleikum en Ibrahimovic er fyrirliði sænska A-landsliðsins og orðinn 33 ára gamall.

„Til hamingju strákar í 21 árs landsliðinu. Þið eigið þetta skilið. Við sænsku víkingarnir gefumst aldrei upp. Svíþjóð með tryggt sæti á Ólympíuleikunum. Hmm ...," skrifaði Zlatan Ibrahimovic meðal annars á twittersíðu sína eftir að úrslitin í riðlinum voru ljós í gær.

Framherji Paris St. Germain hefur sýnt áhuga á því að vera með á Ólympíuleikunum en hvert landslið má nota þrjá eldri leikmenn. Afgangurinn af liðinu verður að vera fæddur 1. janúar 1993 eða síðar.

„Ég hef aldrei spilað á Ólympíuleikum og það væri gaman að fá að fara með til Ríó de Janeiro. En til að byrja með þarf ég að fá réttu skilaboðin frá liðinu. Kannski er ekki pláss fyrir mig," sagði Zlatan Ibrahimovic í viðtali við Sportblaðið.

„PSG hefur líka sitt að segja varðandi þetta og sama má segja um bæði sænska knattspyrnusambandið og Erik Hamrén landsliðsþjálfara. Það eru margir sem þurfa að koma að þessari ákvörðun," sagði Zlatan.