Draumakvöld fyrir Carlos Tevez

Argentína er komið áfram í undanúrslit Suður-Ameríkukeppninnar í Síle eftir sigur á Kólumbíu í vítaspyrnukeppni, 5-4.

Carlos Tevez byrjaði leikinn á bekknum en í miðjum leik staðfesti argentínska félagið Boca Juniors að félagaskipti Tevez frá Juventus á Ítalíu væru frágengin.

Stuttu síðar kom Tevez inn á og hann skoraði svo markið í vítaspyrnukeppninni sem tryggði Argentínu sæti í undanúrslitunum. Tvær umferðir af bráðabana þurfti til að fá niðurstöðu í vítaspyrnukeppnina.

David Ospina sá til þess að vítaspyrnukeppni þyrfti til að knýja fram úrslit en hann varði vel frá þeim Lionel Messi, Srgio Aguero og Nicolas Otamendi.

Argentína mætir sigurvegaranum úr viðureign Brasilíu og Paragvæ í 8-liða úrslitum sem fer fram klukkan 21.30 í kvöld.

Síle og Perú eigast við í hinni undanúrslitaviðureign keppninnar á mánudagskvöld.