Portúgal burstaði Þýskaland

Portúgal burstaði Þýskaland á Evrópumóti leikmanna skipuðum 21 árs og yngri. Leikurinn var liður í undanúrslitum mótsins, en lokatölur urðu 5-0 sigur Portúgals.

Bernando Silva kom Portúgal yfir eftir laglegan samleik á 25. mínútu og Ricardo Pereira bætti við öðru marki á 33. mínútu. Ivan Cavaleiro skoraði svo þriðja mark Portúgala rétt fyrir hlé og staðan 3-0 í hálfleik.

Veislan hélt áfram í síðari hálfleik því strax á fyrstu mínútu síðari hálfleiks skoraði Joao Mario fjórða mark Portúgala og Ricardo Horta rak svo síðasta naglann í líkkistu Þjóðverja tuttugu mínútum fyrir leikslok.

Portúgal er því komið í úrslitaleikinn þar sem liðið mætir annað hvort Danmörku eða Svíþjóð. Liðin mætast klukkan 19:00 í kvöld.