Svíþjóð í úrslit

Svíþjóð er komið í úrslit Evrópumóts skipað leikmönnum 21 árs og yngri eftir 4-1 sigur á grönnum sínum í Danmörku. Í úrslitaleiknum mætir Svíþjóð liði Portúgals sem rúllaði yfir Þýskaland.

John Guidetti kom Svíum yfir af vítapunktinum eftir 23 mínútur, en dómurinn þótti umdeildur. Simon Tibbling tvöfaldaði svo forystuna þremur mínútum síðar og þannig stóðu leikar í hálfleik.

Uffe Bech, lærisveinn Ólafs Kristjánssonar hjá Nordsjælland, minnkaði muninn fyrir Dani á 63. mínútu, en Robin Quiason og Oscar Hiljemark skoruðu sitthvort markið á síðustu sjö mínútunum og lokatölur 4-1 sigur Svía.

Svíþjóð mætir í úrslitunum feykisterku liði Portúgals sem valtaði yfir sigurkandídatana í Þýskalandi, 5-0, fyrr í dag. Úrslitaleikurinn fer fram á þriðjudag.