Özil: Erfiðasta árið á ferlinum

Mesut Özil er þakklátur fyrir þann stuðning sem hann fékk frá Arsene Wenger og stuðningsmönnum Arsenal eftir það sem hann kallar erfðasta árið á ferlinum.

Özil, sem varð heimsmeistari með Þýskalandi í fyrrasumar, var meiddur stóran hluta af nýliðnu tímabili en mætti sterkur til leiks seinni hluta þess.

„Þetta var mjög langt og strangt tímabil og ég held að þetta hafi verið erfiðasta árið á ferlinum,“ sagði Özil.

„Í fyrsta skipti á ferlinum þurfti ég að glíma við erfið meiðsli sem orsökuðust eflaust af of miklu leikjaálagi. Tíminn frá október til nóvember var sérstaklega erfiður. Ég þarf alltaf að vera í fótbolta, jafnvel þegar ég er í fríi.“

Özil kom, sem áður sagði, sterkur inn í lið Arsenal seinni hluta tímabilsins en Skytturnar unnu bikarkeppnina og lentu í 3. sæti ensku úrvalsdeildarinnar.

„Ég get verið mjög sáttur með seinni hluta tímabilsins. Það sást hversu mikið ég naut þess að spila og hversu mikið ég saknaði leiksins,“ sagði Özil sem skoraði fjögur mörk og átti fimm stoðsendingar í 22 deildarleikjum í vetur.

„Ég hef meira sjálfstraust þegar ég finn fyrir stuðningi knattspyrnustjórans og ég fann alltaf fyrir trausti Wengers,“ sagði Þjóðverjinn að lokum.