Óvæntur og sögulegur sigur Kólumbíu á Frökkum

Óvænt úrslit áttu sér stað á HM kvenna þegar Kólumbía gerði sér lítið fyrir og vann Frakkland 2-0 í 2. umferð F-riðils. Lady Andrade og Catalina Umse skoruðu mörk Kólumbíu. Þetta var jafnframt fyrsti sigur Kólumbíu á HM í knattspyrnu kvenna.

Þessi úrslit galopna F-riðilinn. Kólumbía er eftir þennan sigur komið í efsta sæti riðilsins með 4 stig. Frakkar eru í 2. sæti með þrjú stig eftir sigur á Englandi í fyrstu umferð.

England mætir Mexíkó í kvöld og verður að vinna til að halda möguleika sínum á sæti í 16 liða úrslitum á lífi. Með jafntefli á enska liðið enn möguleika en þá þarf allt að ganga þeim í hag í síðustu umferðinni.