Aron Einar framlengir samning sinn við Cardiff

Aron Einar Gunnarsson, landsliðsfyrirliði í fótbolta, hefur framlengt samning sinn við Cardiff um þrjú ár og verður hjá félagsins til 2018.

Þetta kemur fram á heimasíðu félagsins í dag, en Aron Einar gekk í raðir Cardiff fyrir fjórum árum síðan frá Coventry.

Aðeins tveir leikmenn í leikmannahópi Cardiff hafa verið lengur hjá liðinu í dag, en Aron á að baki 168 leiki fyrir liðið og skorað í þeim 18 mörk.

„Ég er mjög ánægður með að binda framtíð mína við Cardiff. Ég hef átt frábærar stundir á þessum fjórum árum og hlakka til að eiga margar fleiri,“ segir Aron í viðtali á heimasíðu Cardiff.

„Ég vil þakka stuðningsmönnunum fyrir stuðninginn og ég hlakka bara til að mæta með strákunum í á undirbúningstímabilið,“ segir Aron Einar Gunnarsson.

Aron er staddur á Íslandi, en hann mun væntanlega leiða íslenska liðið út á Laugardalsvöll þegar strákarnir okkar mæta Tékklandi í undankeppni EM 2016 föstudaginn 12. júní.

#CardiffCity is delighted to announce that Aron Gunnarsson has signed a new deal that will run until summer 2018. pic.twitter.com/CqxRhNbVlI

— Cardiff City FC (@CardiffCityFC) June 2, 2015