Ayew á leið til Swansea

Andre Ayew er nálægt því að ganga til liðs við velska liðið Swansea, lið Gylfa Þórs Sigurðssonar.

Ayew er 25 ára sóknarmaður sem hefur verið á mála hjá Marseille í Frakklandi. Hann verður samningslaus í sumar og greina enskir fjölmiðlar frá því að hann muni senn gangast undir læknisskoðun.

Talið er að Ayew hafi rætt við nokkur félög í ensku úrvalsdeildinni og hefur hann verið orðaður við bæði Arsenal og Newcastle.

Swansea missti Wilfried Bony til Manchester City í janúar og yrði Ayew kærkomin viðbót við leikmannahóp Garry Monk.