Skipstjóri Costa Concordia brast í grát

Francesco Schettino, skipstjóri skemmtiferðaskipsins Costa Concordia sem strandaði við eyjuna Giglio árið 2012, bíður nú eftir að dómarar ákveði refsingu hans. 32 létust í strandinu en Schettino hefur verið ákærður fyrir manndráp, að bera ábyrgð á strandinu og fyrir að yfirgefa skipið á undan farþegum þess.

Réttarhöldunum lauk í dag. Í ræðu sinni fyrir dómnum sagði Schettino að fjölmiðlar hefðu farið illa með sig síðustu þrjú ár. Hann sagði að allri ábyrgðinni hefði verið varpað á sig, án tillits til sannleikans né minningar þeirra sem létust.

Honum tókst ekki að ljúka máli sínu þar sem hann brast í grát og settist aftur niður.

Saksóknarar vilja að hann verði dæmdur í 26 ára fangelsi, samkvæmt Sky News.

Schettino og verjendur hans segja að hann hafi beðið með að láta farþega yfirgefa skipið því hann vildi ekki að farþegarnir myndu hoppa í sjóinn. Þá hafi hann reiknað með því að skipið myndi færast nær eynni, vegna vinds og strauma.

Hann sagði að skerið sem skipið lenti á hafi ekki verið á kortum. Þá var skipinu siglt nær eyjunni en til stóð og Schettino segir að eigandi skipsins hafi sagt honum að gera það.

Skipstjórinn segir þar að auki að hann hafi ekki yfirgefið skipið viljandi heldur hafi hann fallið útbyrðis.

Á meðfylgjandi myndbandi má hlusta á samtal Schettino og yfirmanns strandgæslunnar á svæðinu, eftir að skipstjórinn hafði yfirgefið skipið.