Hvernig verða fötin þín til?

Í fyrra fóru Anniken Jörgensen, Frida Ottesen og Ludvig Hambro í ferð til Kambódíu til að skoða aðstæður fólks sem vinnur í fataverksmiðjum þar í landi. Þau eiga það öll sameiginlegt að vera sautján ára Norðmenn og eiga nokkuð vinsæl lífstílsblogg í heimalandinu.

Heimildarmynd var gerð um ferðalag þeirra og er hún aðgengileg á vef Aftenposten. Hún sýnir vægast sagt ömurlegan aðbúnað verkafólks sem stritar vikuna alla fyrir kaupi sínu.

Meðal þeirra sem verður á vegi þeirra er Sotky, 25 ára, sem vinnur alla daga vikunnar og hefur upp úr krafsinu 130 dollara eða tæpar 18.000 krónur á gengi dagsins í dag. Þar af fara fimmtíu dollarar í húsnæðiskostnað. Vinnudagurinn er í kringum tólf klukkustundir nema á sunnudögum, þá vinni þau aðeins átta klukkustundir. Anniken hefur meðal annars á orði að baðherbergið heima hjá henni sé stærra en allt hús Sotky.

Heimildarmyndin kallast Sweatshop - Deadly Fashion og er í fimm hlutum sem hver um sig er um tíu mínútur. Þau prófa meðal annars að vinna daglangt í fataverksmiðju við að búa til föt og snæða matinn sem þar er í boði.