Skrtel samdi aftur við Liverpool

Varnarmaðurinn Martin Skrtel hefur skrifað undir nýjan þriggja ára samning við Liverpool en félagið staðfesti það í dag.

Skrtel sagði að samningstilboð Liverpool sem hann fékk í byrjun síðasta mánaðar hafi verið óásættanlegt og líktist samningi sem eldri leikmenn í meiðslavandræðum fá.

En aðilar náðu saman á meðan sumarfríinu stóð og hefur Skrtel nú undirritað nýjan samning en undirbúningstímabil hófst í vikunni. Skrtel er þrítugur og kom til Anfield fyrir sjö og hálfu ári síðan.

Skrtel var í byrjunarliði Liverpool í 48 af alls 58 leikjum liðsins á síðasta tímabili. Hann er annar miðvörðurinn sem framlengir samning sinn við Liverpool í sumar en áður hafði Kolo Toure gert það.