Brasilía úr leik eftir vítaspyrnukeppni

Brasilía er úr leik í Suður-Ameríkukeppninni í knattspyrnu eftir tap gegn Paragvæ í vítaspyrnukeppni í átta liða úrslitum keppninnar. Staðan eftir venjulegan leiktíma var 1-1.

Robinho kom Brasilíu yfir á fimmtándu mínútu með skoti úr teignum eftir fyrirgjöf frá Dani Alves. Staðan var 1-0 í hálfleik og Paragvæar ekki að ógna mikið.

Í síðari hálfleik virtist ekki stefna í annað en sigur Brasilíu þangað til á 72. mínútu. Thiago Silva handlék þá boltann á glórulausan hátt eftir fyrirgjöf frá hægri og dæmt var vítaspyrna. Derliz Gonzales steig á punktinn og skoraði.

Staðan var 1-1 að loknum venjulegum leiktíma og því var farið beint í framlengingu. Brassarnir klikkuðu tveimur spyrnum og Roque Santa Cruz fékk tækifæri til þess að koma Paragvæ áfram, en hann lyfti boltanum lengst yfir.

Derliz Gonzales steig svo á punktinn í lokavítinu, sá hinn sami og skoraði í venjulegum leiktíma, og skoraði hann af miklu öryggi. Paragvæ því komið áfram og mæta þeir Argentínu í undanúrslitunum.