Japan á möguleika á að verja titilinn

Japan tryggði sér sæti í undanúrslitum heimsmeistaramóts kvenna í knattspyrnu sem fram fer í Kanada. Japan vann Ástralíu 1-0, en markið kom þremur mínútum fyrir leikslok. Japan á titil að verja.

Fyrri hálfleikurinn var ekki mikið fyrir augað. Japan var meira með boltann, en náði illa að skapa sér góð færi. Staðan var markalaus í hálfleik.

Í síðari hálfleik var jafnræði með liðunum og bæði lið fengu sín færi til þess að skora, en eina mark leiksins kom þremur mínútum fyrir leikslok. Eftir darraðadans í teig Ástrala eftir hornspyrnu skoraði Mana Iwabuchi sitt fjórða landsliðsmark og tryggði Japönum 1-0 sigur.

Japan mætir annað hvort Englandi eða heimastúlkum í Kanada í undanúrslitunum, en leikur þeirra hefst klukkan 23:30 í kvöld.