Mahrez klárar líklega tímabilið með Leicester

Riyad Mahrez, Alsíringurinn í liði Leicester, verður að öllum líkindum áfram hjá Refunum og klárar tímabilið með liðinu.

Þessi öflugi miðjumaður hefur farið á kostum með Leicester í vetur og skorað þrettán mörk og lagt upp önnur sjö fyrir sína menn sem verða afar óvænt á toppnum yfir jólin í fyrsta sinn í sögu félagsins.

Umboðsmaður Mahrez, Kamel Bengougam, segir ekkert formlegt tilboð hafa borist í kappann og segir hann vilja vera áfram hjá Leicester. Þá hefur félagið engan áhuga á að selja hann.

„Ég tel að Leicester vilji ekki selja hann og hann einbeitir sér að því að standa sig vel fyrir liðið. Mahrez vill vera áfram í janúar,“ sagði umboðsmaður hans við Sky Sports.

Leicester er í góðri stöðu með Mahrez því Alsíringurinn skrifaði undir fjögurra ára samning síðasta sumar.