Umboðsaðili fær ekki greidda krónu

Fimleikafélag Hafnarfjarðar vinnur nú að byggingu tveggja nýrra knatthúsa á íþróttasvæði félagsins við Kaplakrika. Byggingarnar eru keyptar af finnsku fyrirtæki sem nefnist Best-Hall. Umboðsmaður fyrirtækisins á Íslandi er Jón Rúnar Halldórsson, formaður stjórnar knattspyrnudeildar FH.

Einkahlutafélagið FH-knatthús annast uppbyggingu knatthúsanna. Einkahlutafélagið er í helmingseigu FH og knattspyrnudeildar FH. Jón Rúnar, sem hefur umboð fyrir finnska fyrirtækið, er stjórnarmaður í FH-knatthús ehf., og formaður stjórnar knattspyrnudeildar. „Það hafa verið reist um það bil sex hús hér á landi frá þessum framleiðanda og ég hef komið að þeim öllum,“ segir Jón Rúnar. „Ég get fullyrt það að ég fæ ekki greidda krónu fyrir uppbygginguna á Kaplakrikavelli. Allir sem vilja vita geta séð það í bókum okkar. Menn hafa spurt sig hvort hér sé um hagsmunaárekstur að ræða, ég sé það ekki.“

FH ræðst alfarið í þessar framkvæmdir sjálft og fjármagnar þær af eigin fé og lánsfé. Birgir Jóhannsson, framkvæmdastjóri knattspyrnudeildar FH, segir skort á húsnæði á suðvesturhorninu og lítið vandamál að leigja út aðstöðuna til að skapa tekjur og standa undir framkvæmdunum. „Við leigjum út tíma í húsinu undir æfingar. Það er skortur á æfingaaðstöðu í stóru húsi og sjáum við mikla möguleika í framkvæmdunum. Eins og staðan er núna þurfum við að finna æfingatíma í Reykjanesbæ og á Akranesi. Einnig hafa margir aðilar sett sig í samband við okkur sem vilja leigja aðstöðu hjá okkur,“ segir Birgir.

Knatthúsin tvö eru mislangt komin í framkvæmd. Lokið verður við minna knatthúsið í lok aprílmánaðar en stærra húsið, sem hýsir knattspyrnuvöll í fullri stærð, á samkvæmt áætlun að verða lokið í október á þessu ári. Hvorki Jón Rúnar né Birgir vildu gefa upp kostnaðinn við framkvæmdirnar. „Við erum byrjaðir að grafa fyrir stærra húsinu. Við þurfum að sjá hvernig klöppin er undir húsinu hvort hægt sé að nota hana sem stífingu. Hönnun hússins ræðst svolítið af því hvernig klöppin lítur út,“ segir Birgir.