Advocaat fær gamlan lærisvein til Sunderland

Dick Advocaat er búinn að fá gamlan lærisvein, Jeremain Lens, til enska úrvalsdeildarliðsins Sunderland.

Lens, sem er 27 ára, kemur frá Dynamo Kiev en Sunderland borgaði úkraínska liðinu átta milljónir punda fyrir Hollendinginn.

„Mínir helstu kostir eru að ég er fljótur, get skorað og skapað færi,“ sagði Lens sem gerði fjögurra ára samning við Sunderland.

Þetta er í þriðja sinn sem Advocaat og Lens vinna saman en leikmaðurinn lék áður undir stjórn Advocaats hjá AZ Alkmaar og PSV Eindhoven.

Lens, sem hefur leikið 29 landsleiki fyrir Holland og skorað átta mörk, varð tvöfaldur meistari í Úkraínu með Dynamo Kiev á síðasta tímabili en liðið fór taplaust í gegnum deildarkeppnina.

Sunderland endaði í 16. sæti ensku úrvalsdeildarinnar á síðasta tímabili.