Þrettán ár í dag síðan að Brassar urðu síðast heimsmeistarar | Myndband

Brasilíumenn urðu síðast heimsmeistarar í fótbolta á þessum degi, 30. júní, fyrir þrettán árum síðan þegar þeir tryggðu sér sigurinn á HM í Japan og Suður-Kóreu árið 2002.

Brasilía vann 2-0 sigur á Þýskalandi í úrslitaleiknum þar sem Ronaldo skoraði bæði mörkin. Ronaldo, sem varð markakóngur keppninnar, skoraði mörkin sín á 67. og 79. mínútu leiksins en í marki Þjóðverja stóð Oliver Kahn.

Luiz Felipe Scolari var þjálfari brasilíska liðsins og í byrjunarliðinu voru þeir: Marcos, Lúcio, Edmílson, Roque Júnior, Cafu (fyrirliði), Gilberto Silva, Kléberson, Roberto Carlos, Ronaldinho, Rivaldo og Ronaldo. Juninho og Denílson komu inná sem varamenn.

Ronaldo skoraði alls átta mörk í keppninni fyrir þrettán árum en Rivaldo var annar markahæstur með fimm mörk. Ronaldinho skoraði síðan tvö mörk en aðrir í liðinu skoruðu minna.

Brasilíumenn hafa ekki unnið heimsmeistaratitilinn síðan. Liðið datt út úr átta liða úrslitunum á HM 2006 og HM 2010 og tapaði síðan 7-1 í undanúrslitum á móti verðandi heimsmeisturum Þjóðverja á HM á heimavelli síðasta sumar. Brassar urðu síðan í fjórða sæti eftir tap á móti Hollandi í leiknum um þriðja sætið.

Brasilíumenn duttu út í átta liða úrslitum Suður-Ameríkubikarsins um síðustu helgi eftir tap í vítaspyrnukeppni.

Hér fyrir neðan má sjá myndband með helstu atvikunum í þessum úrslitaleik sem fram fór á International Stadium í Yokohama í Japan.