Kanada og Kína áfram | Myndbönd

Lokaumferð A-riðils á HM kvenna í fótbolta fór fram í nótt. Gestgjafarnir í kanadíska landsliðinu tryggðu sér sigur í riðlinum þrátt fyrir að hafa fengið á sig síðbúið jöfnunarmark gegn Hollandi.

Leiknum lauk með 1-1 jafntefli en Kanada endaði í efsta sæti riðilsins með fimm stig. Kína hefði getað skotist á toppinn en mátti sætta sig við 2-2 jafntefli við Nýja-Sjáland á sama tíma.

Svo fór að Kína og Holland urðu jöfn að stigum í 2.-3. sæti með fjögur stig hvort. Kínverjar enduðu með betra markahlutfall og fara því beint áfram í 16-liða úrslit keppninnar.

Fjögur af þeim sex liðum sem lenda í þriðja sæti riðlanna komast einnig áfram í 16-liða úrslitin og má telja afar líklegt að jöfnunarmark Hollendinga gegn Kanada í gær hafi tryggt að þeir fari sömuleiðis áfram í útsláttarkeppnina. Nýja-Sjáland er hins vegar úr leik.

Ashley Lawrence kom Kanada yfir snemma leiks í nótt en Kirsten van de Ven skoraði jöfnunarmarkið dýrmæta þegar fimm mínútur voru til leiksloka.

Rúmlega 45 þúsund áhorfendur voru á leiknum og sem fór fram á Ólympíuleikvanginum í Montreal. Þeir gátu fagnað því að Kanada komst áfram upp úr riðlinum í fyrsta sinn síðan á HM 2003.

Holland - Kanada 1-1: Kína - Nýja-Sjáland 2-2: