Búið að reka Inzaghi frá AC Milan

AC Milan tilkynnti í morgun að félagið hafi sagt upp knattspyrnustjóranum Filippo Inzaghi eftir aðeins eitt ár í starfi.

Inzaghi lék með liðinu við góðan orðstír í rúman áratug og tók við starfi knattspyrnustjóra fyrir ári síðan eftir að hafa þjálfað yngri lið félagsins í tvö ár.

AC Milan endaði hins vegar í tíunda sæti ítölsku úrvalsdeildarinnar í vor og komst því ekki í Evrópukeppni annað árið í röð. Liðið vann aðeins sjö deildarleiki eftir áramót og endaði 35 stigum á eftir meisturum Juventus.

Fyrr í mánuðinum sagði Adriano Galliani, stjórnarformaður félagsins, við ítalska fjölmiðla að Inzaghi yrði ekki stjóri AC Milan á næstu leiktíð og það hefur nú verið staðfest með formlegum hætti.