Heimsmeistararnir unnu alla sína leiki | Kamerún tók 2. sætið

Keppni í C-riðli á HM í Kanada lauk í kvöld með tveimur leikjum.

Heimsmeistarar Japans unnu 1-0 sigur á Ekvador í Winnipeg. Yuki Ogimi skoraði eina mark leiksins strax á 5. mínútu en þetta var 54 mark hennar fyrir japanska landsliðið.

Japan vann riðilinn með fullu húsi stiga en Ekvador tapaði öllum þremur leikjum sínum með markatölunni 1-17.

Þá vann Kamerún óvæntan sigur á Sviss í Edmonton. Lokatölur 2-1, Kamerún í vil sem endaði í 2. sæti riðilsins með sex stig. Frábær árangur hjá Kamerún sem er að þreyta frumraun sína á HM.

Svissneska liðið lenti hins vegar í því þriðja með þrjú stig og þarf því að bíða eftir úrslitum úr D-, E- og F-riðli til að vita hvort það kemst áfram í 16-liða úrslitin.

Ana Maria Crnogorcevic kom Sviss yfir á 24. mínútu en Gabrielle Onguene jafnaði metin með sínu öðru marki á mótinu. Það var svo Madeleine Ngono Mani sem tryggði Kamerún sigurinn með sínu 40. landsliðsmarki á 62. mínútu.