Eiður Smári skoraði í sigri Club Brugge

Eiður Smári Guðjohnsen var mikilvægur fyrir Club Brugge í kvöld þegar hann kom inná sem varamaður og skoraði fyrsta mark liðsins í 2-1 heimasigri á Mons í belgísku úrvalsdeildinni í fótbolta.

Eiður Smári kom inná sem varamaður á 69. mínútu leiksins og skoraði markið á 82. mínútu eftir undirbúning belgíska miðjumannsins Vadis Odjidja-Ofoe. Mons jafnaði á 86. mínútu en Ísraelsmaðurinn Lior Refaelov, sem kom líka inná sem varamaður, skoraði sigurmark Club Brugge tveimur mínútum síðar.

Þetta var annað mark Eiðs Smára á leiktíðinni en hann skoraði einnig í 3-0 sigri á KV Mechelen í byrjun desember.

Eiður Smári fékk ekkert að spila í 0-2 tapi á móti Anderlecht um síðustu helgi en minnti vel á sig í kvöld.  Sigurinn kemur Club Brugge upp að hlið Anderlecht í 2. til 3. sæti deildarinnar en Standard Liège er með tíu stiga forskot eftir 4-0 sigur á Cercle Brugge fyrr í dag.

Serbinn Nemanja Gudelj skoraði bæði mörk AZ Alkmaar í 2-0 heimasigri á Groningen í hollensku úrvalsdeildinni. Aron Jóhannsson var í byrjunarliðinu og Jóhann Berg Guðmundsson kom inná sem varamaður á 76. mínútu.