Tvær orrustuþotur skotnar niður í Úkraínu

Aðskilnaðarsinnar í austurhluta Úkraínu skutu niður tvær orrustuþotur úkraínska stjórnarhersins fyrr í dag. Talsmaður Úkraínuhers segir aðskilnaðarsinna hafa skotið þotunum niður nærri bænum Snizhne, 80 kílómetrum austur af Donetsk.

Á vef CNN segir að flugmennirnir hafi náð að skjóta sér út, en annars er ekki vitað um líðan þeirra að svo stöddu.

Þoturnar eru af gerðinni Suchoj Su-25 og voru skotnar niður um klukkan ellefu að íslenskum tíma.

Að sögn Reuters hafa harðir bardagar geisað nærri höfuðvígjum aðskilnaðarsinna, Donetsk og Luchansk, í allan dag.